وردة إبداع

عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة منتدي وردة إبداع
سنتشرف بتسجيلك
شكرا
ادارة المنتدي

إبداع غير محدود


قصة عيشة العمشة بالدارجة المغربية

شاطر
avatar
google
المديرالعام
المديرالعام

تاريخ التسجيل : 14/12/2010

قصة عيشة العمشة بالدارجة المغربية

مُساهمة  google في السبت نوفمبر 07, 2015 2:29 am

سلام جبتلكم قصة زوينة وكوميدية نضحكو شوية
قصة "عيشة العمشة "

أمالك أهداك بوخنونة..ياكما سخنو عليك جنابك..والله ومتحيد كروستك من بلاصتي حتى نعاود لمك الصلخة ديال داك نهار
ختي عيشة بلا معيوور..راه عير شفتك تعطلتي..وحطيت بلاصتك..
واخا نتعطل..هاد البلاصة ديال عيشة مولات القزبور..ولي جا ليها يطير ليه الراس..
حدر راسوو ودفع كروستوو..بلا ميزيد حتى كلمة حيت عارف راسو معامن
ومعامن غادي يكون من غير عيشة العمشة ..شعالة العوافي..لي ديما مدابزة ومحيحة فالمارشي
عيشة الملقبة بالعمشة..بنت المارشي والسواق..عندها شي عشرين عام ولكن لي شافها يعطيها كثر..مبينها وبين الأنوثة غير الخير والاحسان..ديما لابسة واحد الكيطمة..مرسوم فيها راية ميريكان..تقاشر..كحلين مقطعين من الكدام..عاكسة داك الراس بو'احد زيف حياتي بيض ولكن مع الربيع والباربة..والغبرة والتراب..ولاو فيه ألوان الطيف..قرات حتى للسيزيام..فاش مرض باها ومات..خرجات من القرايا حيت هي الكبيرة..وخلا خوتها صغار ومها مريضة...شمرات على الكتاف..وخرجات لبلاصة ديال باها فالسواق ..والمارشيات..
فظرف عام رجع كلشي عارفها ..وتيخاف منها ..من نهار كانت غاديا تطير لواحد الخضار..ودنييه..
داك النهار ..كان بحرا مات باها..جاية للمارشي كيف العادة..لقاتو شاد ليها بلاصتها..بقات معاه الهضرة والمعيوور..حلف لا تزعزع من بلاصتها..طارت ليه طيرة وحدة على وذنيه بعضة..كون ما فكوهش..كون طيراتها ليه..
وكانت ديما تغوت وتهلل..ومحيحة..وكانت معقولة فالبيع..والشرا متدي لحد ديالوو..متخلي حد يدي ليها ديالها..
منقدرووش نعرفوا واش زوينة ولا خايبة..حيت ملامحها مخربقين..كانو عينيها مراض وفيهم الحساسية..والطبيب قاليها تبعد على الربيع والنباتات..وكيف تدير تبعد..وهداك طرف الخبز ديالها..
داكشي لاش كانو عينيها ديما معمشين..وكلشي تيعيط ليها" عيشة العمشة".وكالة الوذنين
هاد الصباح ناشطة..وفرحانة..سلعتها جديدة وطرية..
أزيدو زيدو مابقى والو الربيع..الكرافص..الحمص فازغ.. زيدي الحادكة ديري الحريرة..تتغوت والعيالات تيشريوا منها ويتعاودو معاها..
موحا مول الصنك تيدور..غير تتشوفو تيتخسر ليها النهار
صبحنا ع الله وجه النحس
موحا:صباح نور عويشة..
فنفسها:عيشة قنديشة لي تضربك تعوجك وانت معوج من ربي..
عيشة:اش كاين أموحا واش تبدا بيا انا لولة..راه المارشي طويل وعريض..خليني نترزق الله بعدا..
موحا:وعويشة ..وشكون قالك أري الفلوس..غير رضي عليا..وتعيشي معايا فالعشة ميخصك تاخير..
عيشة خرجات فيه عينيها:تا تمشي ولا نوض ليك أعينين موكا ..العشة تخركها ان شاء الله..والله وما تبدل الساعة حتى نعلفك الربيع والكرافص..يالله دووب
مشا موحا تيجري..وخايف لادير فيه شي مصيبة..
كملات البيع والشرا..مشات شرات خضيرة ولحيمة لدارهم..أغلبية تيعطيوها الخضرة فابور باش يسلموا من شرها...
دفعات كروستها ومشات..طلعات مهلوكة للدار..وتجبدات فوق واحد السداري..
مها:انوضي حيدي دوك النقاشر وغسلي دوك الرجلين بعدا..راكي دوختينا..
عيشة:أمي راه رجليا متيديروش الريحة..
مها:أويلي نوضي شوفي خوتك سادين نيوفهم..
عيشة:اوووف الله يستر متخليوا حد يرتاح
مشات خشات رجليها تحت الروبيني وجات..
حطات مها الغدا..تغدات..ومشات تنعس باش عشية عندها مايدار..وفراسها واحد البلان..
شخرات مزيان حتى جات مها:عيشة وا عيشة
عيشة:مممم
مها:وتي نوضي راه الخمسة هدي..
عيشة قفزات: وتعطلت أمي
ناضت نيشان لبسات سبرديلتها وهبطات..
البارح فالسوق سمعات التجار تيهضرو على واحد السيد لباس عليه..عندوو الفارم تيبيع الخضرة رخيصة..وهي قررات تبدل الحرفة..علاش متوليش هي لي تبيع ليهم الخضرة..وتولي مرفحة وتدير بيكوب ..ولا كاميو كاع..
ركبات طاكسي مشات لديك الفيرمة..تمات غادا داخلة بحال الى داخلة لكوري..جاي واحد العساس تيجري..شدها من يديها:ألالة فين داخلة واش زريبة هدي..
غير شدها طارت عليه بقجة حتى خرجو عينيه..وهي تتنزل عليه هاك بالاك هاك بالاك..حتى سخفاتو
تجمعوا عليها الخدامة..وتيفكوا .وصداع..
شوية خرج واحد الشاب بگوس ضارب واحد لبسة شيك
شافتو عيشة وحلات فمها..
تم جاي لعندهم:أش هاد الصداع..اش هاد الفوضى..شكون هذي..واش حمقة؟؟
العساس:سي مصطفى معرفتها منين خرجات ليا..جايا داخلة حبستها ودارت ليا هاد الحالة..
عيشة فاش قال عليها الحمقة كانت غاتخلي دار بووه..غير سمعاتو سي مصطفى..وهي تفراني حيت غارضها بيه
مصطفى:اش كاين الالة شكون نتي واش باغا..
واش نتي من العيالات ديال الموقف..؟ اش هاد الفوضى دايرة ليا...


_________________







    الوقت/التاريخ الآن هو الإثنين يوليو 16, 2018 8:29 am